Anilton Levy

Mudjer di Cabo Verde

Mudjer di cabo verde
Mudjer di nha tera
Mudjer di verdade
Mudjer di paz y guera

Mudjer sem medu
Ta corda sedu
Ta durmi so dipos di si fidju
Ta labuta tudu dia
Ta fazi possivel e imposivel
Pa ka falta pom-di-kada-dia

Mudjer ki luta
Triste di kes ki ka bai skola
Ki sufri na mó di maridu
Ki leba bafata
Pa ka papia,
Pa obi y obedece
Sera ki skravatura inda ka kaba?

Mas ku tempu bu rivolta
Bu ka larga panela
Mas bu pega na caneta
Bu labanta rostu
Bu grita
Pa mundu obi ma bu tem voz
Bu txora
Pa xintindu ma bu tem sentimento
Bu fidju bu educa
Pa ser midjor ki bo
Bu konkista igualdade
Mesmu ku dificuldade
Hoje bu podi gosa liberdade

So na ora di parto
Kim kre pa bu xinti dor
Bu ka mereci sufri
Bu nanci pa dá y recebi amor

Hoje bu podi realiza sonhu
Ki bu sunha onti
Bu podi ser kel ki bu kré
Pamodi si omi é kel ki el é
É graças a bo

espero que no coração do homem tenha amor,
para que em vez de lágrimas ofereça-te uma flor

Anilton Levy